Aulasfóra

 

De volta no MUPEGA

Unha tarde aprendendo

Na tarde de hoxe xoves, 15 de marzo, visitamos novamente o MUPEGA, nesta ocasión co alumnado da materia Persoas maiores, Memoria comunitaria e Patrimonio educativo, do Máster Universitario de Investigación en Educación. Diversidade Cultural e Desenvolvemento Comunitario, que impartimos na Área de Teoría e Historia da Educación da USC. A visita centrouse fundamentalmente na área museográfica dedicada ás Escolas chegadas de Alén Mar. Dita área está directamente relacionada cos contidos tratados no seminario «De centros escolares a lugares de memoria. As escolas de americanos en Galicia como axencias ao servizo da posta en valor da cultura emigrante e do desenvolvemento comunitario a escala local» que forma parte da citada materia do máster e do que somos responsables docentes. A visita rematou cun percorrido pola exposición temporal «O mundo nas mans. Cartografía escolar dos séculos XIX e XX».

Trala sesión académica, os alumnos e as alumnas opcionalmente visitaron pola súa conta a sección das aulas históricas e a sala da Rede MUPEGA.

Moitas grazas pola acollida e os nosos parabéns á técnica da área de didáctica do Museo, Silvia Veiga Salgado, que nos acompañou e guiou durante todo o itinerario polas instalacións museísticas.

No MUPEGA permaneceu durante case cinco meses a mostra Luces de Alén Mar no ano 2013.

Luces de Alén Mar

Fai hoxe un lustro
Inauguración de LUCES DE ALÉN MAR no MUPEGA

O mércores 6 de febreiro de 2013 inauguramos a mostra Luces de Alén Mar no Museo Pedagóxico de Galicia (MUPEGA). Durante a mañá daquel día tivo lugar no centro museístico unha rolda de prensa de presentación dos contidos da exposición, na que participaron o conselleiro de Cultura, Educación e Ordenación Universitaria, o presidente do Consello da Cultura Galega, o secretario xeral da Emigración e o comisario da mesma. No serán celebrouse o acto de inauguración oficial no que interviñeron o presidente do Consello da Cultura Galega, o secretario xeral de Cultura, o secretario xeral da Emigración e o comisario da mostra, asistindo un numeroso grupo de xente, chegada de distintas localidades de Galicia. Nas dúas sesións fixemos un percorrido guiado polos 43 paneis que compoñen a produción expositiva, arrequecidos con abundante documentación inédita, xornalística e fotográfica, e complementados con diversos útiles didácticos dos establecementos educativos sufragados polos emigrantes e fontes de variada tipoloxía en torno aos filántropos indianos e ás sociedades de instrución que promoveron no seu día os centenares de colexios espallados por todo o territorio galego. Tamén se dispuxo de dous puntos interactivos e dun sitio web específico sobre as escolas da emigración e os seus artífices para  a consulta directa por parte dos visitantes interesados no tema, así como dun exhaustivo catálogo da mostra en dúas versións e dun tríptico para guiar o percorrido polos quince bloques temáticos nos que esta se estrutura. Cómpre sinalar que o espazo central do museo leva por título «As escolas chegadas de Alén Mar», en lembranza e homenaxe aos emigrantes transoceánicos polo  labor desenvolvido a prol da ensinanza nos seus lugares de orixe. Sendo así, esta sección expositiva permanente integrouse como unha peza cardinal da mostra.

Luces de Alén Mar permaneceu aberta ao público na sala de exposicións temporais do MUPEGA ata o venres 28 de xuño daquel ano, sendo visitada por máis de 3500 persoas, que polo regular lle dispensaron unha magnífica acollida. Grazas a todas elas e ao persoal técnico do museo pola súa colaboración. O itinerario continúa cinco anos despois. 

  

 

 

A nova na prensa:

 

- La Voz de Galicia

- España Exterior 

- Galicia en el Mundo

- El Correo Gallego1

- El Correo Gallego2

- presspeople

A nova na rede:

- Mupega1

- Mupega2

- Mupega3 

- CCG1 

- CCG2

- CCG3 

- Secretaría X. Emigración1

- Secretaría X. Emigración2  

- Portal Inmigración

- Berenguela

- MtN

- Botóns

- dehistoria

- RedAIEP

- Grafosfera 

- SdC Turismo 


 

Luces de Alén Mar

LUCES DE ALÉN MAR, seis anos de itinerario [2012-2017]

Dende a súa preestrea no Palacio de Congresos e Exposicións de Galicia, en Santiago de Compostela, no marco do X Pleno do Consello de Comunidades Galegas, o 28 e 29 de xuño de 2012, ata a súa presentación na Casa da Cultura da vila da Baña, durante o pasado mes de novembro, Luces de Alén Mar, no seu periplo por Galicia, exhibiuse en trinta salas e vinte e oito localidades, ao compás da conmemoración do centenario fundacional das Sociedades de Instrución microterritoriais constituídas en América e da apertura das Escolas de Americanos pola xeografía galega adiante. Unha e outra efeméride proseguirán ao longo de dúas décadas máis. Agardamos que os convites para a celebración desta homenaxe colectiva continúen proliferando nos próximos anos e a mostra poida chegar a moitas outras cidades, vilas e parroquias do país. E talvez máis adiante, se a sorte e o bo facer acompañan, teña ocasión tamén de sucar o Mar Océano para recalar na outra banda do Atlántico, dende onde no seu día viñeron as Luces que alumearon a Terra. O fulgor daquelas vellas luminarias aínda escintila, de cando en cando, entre as angueiras educativas cotiás, no ronsel do que fomos e nas somas do imaxinario en común compartido.

 

 

Cartelón anunciando a exposición na súa preestrea

 

Algúns paneis de Luces de Alén Mar na súa primeira presentación

Visitante da mostra no Palacio de Congresos (Secretaría Xeral da Emigración)