Febreiriño
Contando anos
Memoria dun
Calquera día do ano é magnífico para ver a luz primeira, pero poucos tan acaídos coma o de hoxe polo que nel se celebra. No Día internacional da Lingua Materna que, casualmente e por fortuna, acabou coincidindo coa data en que eu nacín, deixo por aquí a modo de curiosidade uns cativeiros versos propios, inxenuos, vizosos e combativos, dunha remota adolescencia tardía ou dunha mocidade temperá –como cada quen os queira entender–, que adquiren un gorentoso relouco ao encarar a vellez. Aí van, pois, cun certo rubor, neste 21 de febreiro, antes de pasar a folla irreversible do calendario camiño dun novo ano. Se cadra, noutro momento haberá máis.
Labrego que mollas
a suor de sangue
e a terra erma
de tristura e morte;
escoita hoxe o meu berro,
o meu laiar asolagado
que nace do fondo da alma.
Berra comigo forte,
ben forte,
tan forte...
que os oídos burgueses
esgacen de medo.
Tan forte...
que as tecnócratas bágoas
calen os ósos da terra.
Berra, laia comigo parello
para que os nosos berros xuntos
resoen feridos no ceo
e unha chuvia de xustiza
naza para os nosos labregos.
«Himno final Labrego (Chuvia de xustiza)». De «Labrego. “Longo poema en catro cantos e un himno”». La Voz de Ortigueira, nº 3140, 3/9/1976. [Orixinal, Compostela – San Claudio, verán de 1976].